Единствениот пат за исчистувањето на нагонското зло во себе е љубовта
Раскољников од „Злосторство и казна“ е горделива и комплексна личност со
многу позитивни и негативни особини. Во крајна линија е убиец, бидејќи ги убива бабата и нејзината сестра, но прави толку други добри работи што не можеме да го восприемиме како вистински убиец, и покрај тоа што „нема никакво оправдување за извршено убиство, зашто сечиј живот е вреден“. Откако го извршува злосторството, прво пронаоѓа рационални објаснувања за неуспехот, но потоа се враќа на својата филозофија – дека не убил човек, туку принцип – обидувајќи се да се утеши на тој начин. Сепак, како одминува времето, сфаќа дека утеха нема, дека најголем проблем е грижата на совеста и душевната болка. Станува рамнодушен кон сите и кон сè, кон никого не може да биде искрен, со никого не може да зборува – зашто тој направил нешто што другите не направиле и што не ќе можат да го сфатат. Отуѓеноста е најтешката последица на злосторството. При крајот одлучува да ѝ се исповеда на Соња, поради што гордоста не ќе му дозволи цела година да погледне во неа. Ќе му биде срам и не ќе знае како да го продолжи животот, но добрината, цврстината и решеноста на Соња да му помогне, ќе успеат. Тој по една година ќе сфати дека таа е спасот – љубовта кон неа и нејзината филозофија. Во романов посебно внимание е посветено на нашата филозофија, на начинот на кој размислуваме и како тој ни влијае. Во оваа приказна прикажано е како мислите му го уништуваат животот на главниот херој, но штом некому му го уништиле – значи дека имаат и тоа каква моќ. А таа моќ самите ние одлучуваме како да ја искористиме – да си го уништиме животот или пак да го достигнеме оној од соништата, односно како што вели психологијата „Моќта е во секој од нас, ние и никој друг одлучуваме како ќе ја искористиме“.